Бритпоп: Шилдгүүд

Бритпоп хэмээх хөгжмийн урсгал нь Британы бие даасан хөгжмөөс үүссэн бөгөөд 1960, 1970 аад оны үеийн хамтлагууд болон поп хамтлагуудын нөлөөн дор хөгжсөн юм. Хөгжмийн дугаралтын хувьд хөнгөн хэв маягтай ба ерөнхийдөө рок хөгжимд ашиглагддаг хөгжмийн зэмсгүүдийг хэрэглэдэг. Бритпоп урсгал нь ерөнхийдөө Британы соёлыг өөртөө тусгасан байдаг боловч энэ урсгалд өөр бусад олон урсгал чиглэлүүд нөлөөлсөн байдаг юм. За ингээд энэхүү урсгалын хамгийн шилдэгт тооцогддог хамталгуудтай танилцицгаая.

Oasis

Oasis хамтлаг

Цөлийн баян бүрдээс ч илүү алдартай Oasis хамтлаг нь 1993 онд Ангилын Manchester-д  Liam Gallagher (вокал), Noel Gallagher(соль), Paul Arthurs(ритм), Paul McGuigan(басс), Tony McCarroll(бөмбөр) гэсэн бүрэлдэхүүнтэй байгуулагдаж байжээ. Тэд бол гайхамшигтай ур чадвараараа танигдаж чадсан Британы шилдэг хамтлагуудын нэг билээ. Сургуулийн найзууд байсан Liam Gallagher, Paul Arthurs, Paul McGuigan, Tony McCarroll нар хамтран анх Oasis хамтлагийг байгуулсан ажээ. Яг тэр үед нилээд хэдэн жил The Stone Roses хамтлагт гитарын технигч хийсэн Liam Gallagher-ын ах Noel Gallagher Manchester-д иржээ. Түүнд шинэхэн хамтлагынхан элсэх санал тавьхад тэр зөвшөөрсөн бөгөөд ингэж алдарт хамтлаг маань дүр төрхөө олжээ.

Тэд анхны цомгоо 1994 онд Definitely Maybe нэртэйгээр гаргасан нь маш богино хугацаанд хит болж, британы түүхэнд хамгийн хурдан зарагдсан цомог болж байжээ. Цомогт багтсан Shakermaker, Live Forever, Supersonic, Cigarettes & alcohol зэрэг дуунууд нь маш хит болж байв.

Хамтлаг дараагийн цомгоо 1995 онд (What's the Story) Morning Glory? нэртэй гаргасан ба уг цомог нь Michael Jackson-ны Bad хэмээх цомгоос хойш хамгийн их борлуулалттай цомог болсон байна. Энэ үед хамтлагийн бөмбөрчин Tony McCarroll хамтлагаас гарч түүний оронд Alan White ирсэн гэдэг. 1997 онд Be Here Now нэртэй цомгоо гаргажээ. Уг цомог өмнөх 2 цомгийнхоо амжилтыг эвдэж чадаагүй ч гэсэн тэдний шилдэгт нэрлэгдэх дуунууд энэ цомогт орсон байдаг. 1999 онд Paul Arthurs хамтлагаас гарч түүний оронд Gem Archer хамтлагт элсчээ. Мөн басс гитарчин Paul McGuigan хамтлагаа орхиж Andy Bell элссэн байна.

Шинэ Oasis

Тэд Standing on the Shoulder of Giants (2000), Familiar to Millions (2001), Heathen Chemistry (2002), Don't Believe the Truth (2005) цомгуудаа тус тус гаргаж, хамгийн сүүлд 2008 онд Dig Out Your Soul нэртэй цомгоо гаргасан билээ.

Харин 2010 онд тэдний дунд асуудал үүсч, Liam, Gem Archer, Andy Bell, Chris Sharrock нар Beady Eye хэмээх хамтлагийг байгуулаад байгаа билээ. Гайхамшигт Oasis хамтлаг дахин нэгдэж тоглох уу гэдэг нь тодорхойгүй байна.




Blur

(Зүүн гар талаас Damon Albarn, Graham Coxon, Alex James, Dave Rowntree)

Британы хөгжмийн ертөнцөд нилээдгүй том байр суурь эзэлдэг хамтлаг бол Blur юм. Blur нь анх1989 онд Англид дуучин Damon Albarn, гитарчин Graham Coxon, басс гитарчин Alex James, бөмбөрчин Dave Rowntree нарын бүрэлдхүүнтэй байгуулагджээ. Damon Albarn, Graham Coxon нар 1988 онд Лондоны Goldsmiths College-д Alex James-тэй анх уулзжээ. Энэ оны 10 сард Albarn бөмбөрчин Dave Rowntree ы хүсэлтээр Circus хэмээх шинэ хамтлагт элсчээ. Удалгүй хамтлагийн гитарчин хамтлагаас гарч оронд Coxon эллсэн байна. Мөн өөр нэгэн гишүүнийг хамтлагаас гаргаж түүний оронд басс гитарчин Alex James элссэн байна. Ингээд 1988 оны 12 сард тэд өөрсдийгөө Seymour хэмээн нэрлэх болжээ. 1989 оны 11 сард Food Records-ын Andy Ross хамтлагийг өөрийн лебилд татаж чаджээ. Харин тэдэнд хамтлагийн нэр таалагдахгүй байсан бөгөөд тэдний нэрийг Blur хэмээн өөрчилсөн байна.

Хамтлаг анхны цомгоо 1991 онд Leisure нэртэйгээр гаргасан байна. Хоёрдахь цомгоо Modern Life Is Rubbish нэртэйгээр 1993 онд гаргажээ. Харин тэдний гуравдахь цомог 1994 онд Parklife нэртэйгээр гарч маш их амжилт олж чаджээ.

Тэд нийт 10 цомог гаргаад байгаа ба хамгийн сүүлд 2003 онд Think Tank цомгоо гаргажээ. Харин тэд 2011 онд шинэ цомгийнхоо ажилд орон ажиллаж байгаа бөгөөд тэд энэ жилийн grammy шагналд нэр дэвшээд байгаа ажээ.






The Verve

The Verve

Английн Виганаас гаралтай алдарт The Verve хэмээх хамтлаг. Тэд 1989 онд Өмнөд Анлгийн нэгэн бяцхан хот болох Виганд байгуулагджээ. Анх байгуулагдахдаа ихэмсэг бардам рок одын дүр төрхийг харуулсан хамтлагийн дуучин Richard Ashcroft, гитарчин Nick McCabe, басс гитарчин Simon Jones болон бөмбөрчин Peter Salisbury нарын бүрэлдхүүнтэй байлаа. Тэд байгуулагдаад хамтлагийнхаа нэрийг Verve хэмээн нэрэлсэн байна. 1992 онд тэд All in the Mind, She's a Superstar, Gravity Grave нэртэй гурван синглийг гаргасан нь тэдний алдрын оргилд гарах эхлэл байсан юм. Мөн энэ онд тэд The Verve EP цомгийг гаргаад амжсан байна. Ингээд 1993 онд тэдний анхны цомог A Storm in Heaven худалдаанд гарлаа. Энэ цомгийг анх гарч байх үед хөгжим шүүмжлэгчид их муугаар хүлээн авч, амжилт олж чадахгүй гэж байсан хэдий ч цомог маш ихээр зарагдаж байдал харин ч эсрэгээр эргэсэн гэдэг. Үүний дараа тэр үеийн Америкийн Verve нэртэй нэгэн хамтлаг өөрсдийн нэрийг нь хулгайлсан хэмээн маш хүчтэй заргалдсан байна. Үүнээс болж тэд нэрээ The Verve болгон албан ёсоор өөрчилжээ. 1995 онд тэд хоёр дахь цомог болох A Northern Soul ыг гаргалаа. Цомог гарахаас өмнө тэд нилээд сэтгэл хангалуун байсан ба маш их амжилттай байна гэдэгт итгэлтэй байсан юм. Гэвч цомог бодож байсанаас хамаагүй муу зарагдаж тэдний сэтгэлийг гонсойлголоо. Гэтэл гитарчин McCabe хамтлагтаа нэгдэхээс татгалзсан юм. Ингээд түүнийг орлон гитарчин, даралтад хөгжимчин Simon Tong ажиллаж эхлэв. Гэсэн хэдий ч 1997 оны эхээр McCabe дахин хамтлагтаа буцаж ирлээ. Ингээд тэд 1997 онд алдарт, гайхамшигт цомог Urban Hymns ыг гаргалаа.

Urban Hymns

Цомгийн эхлэл болгож Bittersweet Symphony дууг олон нийтэд хүргэв. Энэ цомог нь тэднийг Британы хамгийн шилдэг хамтлагуудын тоонд аваачсан юм. Цомгийн хоёр дахь сингл The Drugs Don't Work нь Британы хамгийн шилдэг синглүүдийн нэг болсон юм. Энэ үе бол тэдний оргил цэгтээ хүрсэн үе байсан хэдий ч тэд удалгүй тарсан билээ. Хамтлаг албан ёсоор 1999 онд тарсан байна. Дуучин Richard Ashcroft хувийн каррераа хөөх болж, үүндээ ч сэтгэл хангалуун байсан юм. Тэрээр 2000 онд өөрийнхөө анхны цомог Alone with Everybody ыг гаргажээ. Simon Jones, Simon Tong хоёр the Shining хэмээх нэртэй хамтлаг байгуулсан хэдий ч удаан оршиж чадалгүй таржээ. Харин урт удаан хугацаанд тарж алга болсон The Verve 2008 онд Forth нэртэй цомгоо гаргаж дахин эргэж ирлээ. Бүтэн 11 жилийн дараа тэдний дөрөв дэхь цомог гарсан юм. Уг цомог тийм ч муугүй амжилт үзүүлж нилээдгүй хувиар борлогджээ.






Suede

Suede (The London Suede)

Suede хамтлаг нь 1989 онд Лондонд дуучин Brett Anderson, гитарист Bernard Butler, басс гитарчин Mat Osman, бөмбөрчин Simon Gilbert нарын бүрэлдэхүүнтэй байгуулагджээ. Мөн тэднийг The London Suede ч гэх нь бий. Хүчтэй дугаралттай, далд утга агуулсан, бас уянгалаг, сэкси энэ хамтлаг нь Британы шилдэг хамтлагуудын тоонд багтдаг юм. Бусад бритпоп хамтлагуудаас ялгаатай нь тэдний сэксуал дүр төрх байсан юм. Анхныхаа цомгийг тэд 1993 онд хамтлагийнхаа нэрээр нэрлэн гаргажээ. Цомог гарсан дариудаа хит болж, Британы чартыг түрүүлж байсан байна. Эхний 7 хоногтоол гэхэд 100,000 хувь борлогдож байжээ.

Анхны цомог `Suede`

Тэдний энэхүү хэв маяг нь чухам хамтлагийн дуучины дүр төрхийг ихээр шингээснийх байсан юм. Brett Anderson бол бисэксуал нэгэн юм. Гэхдээ тэр гомосэксуал тал руугаа илүү илэрхийлэн гаргадаг. Тиймдээ ч түүний байгаа байдал хамтлагийн дуунуудад нягт шингэсэн байдаг. Түүниий дуулах чадвар нь мөн л эмэгтэйлэг төрхийг харуулж чаддаг.

Тэд хоёр дахь цомгоо 1994 онд Dog Man Star нэртэйгээр гаргасан юм. Уг цомог өмнөх цомгоосоо төдийлөн илүү гараагүй ч мөн дутхааргүй сайн цомог болсон гэж үздэг. Энэ үед хамтлаг гитарчнаа сольж 17 настай Richard Oakes -ыг авсан байна. 1997 онд тэд Coming Up нэртэй 3 дахь цомгоо гаргажээ. Уг цомогт тэдний алдарт сиглүүд болох Beautiful Ones, Trash, Lazy зэрэг нь багтсан байдаг. Хамтлаг 1999 онд Head Music, 2002 онд A New Morning зэрэг цомгуудаа тус тус гаргасан юм.

Энэ үед хамтлагийн дуучин гирон болон крак кокэйнд тондож эрүүл мэнд нь муудаж эхэлжээ. 2003 оноос хамтлагийн үйл ажиллагаа зогсож, Anderson хувийн каррераа хөөж, мөн The Tears хэмээх хамтлагт тоглох болжээ. Харин 2010 оноос Suede хамтлаг нэгдэж байгаа ажээ. Тэдний хэв маяг өмнөх шигээ байх уу эсвэл өөр дүр төрхийг үзүүлэх үү гэдгийг цаг хугацаа харуулна биз ээ.





Travis

Travis

Хөгжилтэй, цоглог, дүрсгүй боловч нэгэн далд ертөнцийг харуулах мэт Британы нэгэн чадвартай, гайхалтай хамтлаг бол Travis юм. Travis нь 1990 онд Шотландад байгуулагджээ. Дуучин Francis Healy, гитарчин Andy Dunlop, бөмбөрчин Neil Primrose, басс гитарчин Dougie Payne гэсэн бүрэлдэхүүнтэй байгуулагдаж одоо хүртэл өөрчлөгдөөгүй байгаа юм. Тэд анхынаа сиглийг 1996 онд All I Wanna Do Is Rock нэртэй гаргаж байжээ. Харин анхыхаа цомгийг 1997 онд Good Feeling нэртэй гаргаж нилээдгүй амжилт олж чаджээ. Уг цомогт All I Want to Do Is Rock, Good Feeling, I Love You Anyways зэрэг дуунууд нь орсон байдаг. Харин 1999 онд тэд The Man Who цомгоо гаргаж маш их амжилт олж чаджээ. Цомогт орсон Why Does It Always Rain on Me?, Writing to Reach You зэрэг дуунууд хит чартуудыг тэргүүлж байлаа. Шүүмжлэгчид тэдний 2 дахь цомгийг өмнөх цомгоосоо илүү уянгалаг, намуухан, гунигтай болсон гэдэг. Үнэхээр ч тэдний 2 дахь цомог өмнөх цомгоосоо нилээдгүй өөр дүр төрхтэй болсон байдаг. Мөн энэ цомгийг шилдэг бритпоп цомгуудын тоонд багтаан нэрлэх нь ч бий.

The Man Who

Тэдний дараагийн цомог 2001 онд The Invisible Band нэртэйгээр гарчээ. Уг цомог тийм ч муу байгаагүй юм. Мөн тэдний хит сингл болох Sing энэ цомогт багтсан байдаг билээ. 2003 онд тэд Баруун Шотландын нэгэн жижиг студид шинэ дуунууд бичиж дараагийн цомгоо 12 Memories хэмээн гаргажээ. Энэ цомгийг Элтон Жонн "Beatles ийн Revolver (1966) мэт яг л хуучны дуунууд шиг" гэж хэлсэн нь бий. Харин Closer, Battleships зэрэг дуунуудыг нь багтаасан тэдний 5 дахь цомог 2007 онд The Boy with No Name нэртэй гарчээ. Closer дууны клипэнд хамтлагийн найз Ben Stiller хамт тоглосон байдаг. 2008 онд тэд Ode to J. Smith нэртэй цомгоо гаргаад байгаа юм.


Бусад шилдэг хамтлагууд:

Radiohead
Cast
Manic Street Preachers
Elastica
The Stone Roses
Ocean Colour Scene
Pulp

Хөнгөн хэв маягт дуртай, мөн уянгалаг боловч хүчтэй дууг эрхэмлэдэг хүмүүс бритпоп урсгалд дурлах нь бий. Орчин үед нилээд түгээмэл болж байгаа энэ урсгал хөгжмийн ертөнцөд өөрийн байр суурийг нэгэнт олжээ. Нэг ёсондоо энэ урсгалыг Британы хэв маяг гэж хэлж ч болох юм.

Л.Төрбурам

Share |